葡萄牙杀入2022世盃决赛周！周三(30日)凌晨世盃外欧洲区附加赛决赛，葡萄牙凭「曼联双星」C朗拿度同般奴费南迪斯完美连线，主场以2比0击败北马其顿抢走出线席位。今届将会系C朗第5次出战世盃决赛周，亦好可能系已经37岁嘅佢，喺呢项大赛终极一战。

面对上轮爆冷淘汰意大利嘅北马其顿，葡萄牙今场生死战精锐尽出，战况亦一如所料围攻客队，关键嘅开纪录入球出现喺32分钟，C朗同般奴费南迪斯中场美妙配合，C朗去到禁区顶巧妙「通坑渠」助攻，斜传畀般奴费南迪斯轻松射入。般奴费南迪斯65分钟再接应迪亚高祖达大脚传中，禁区内快脚笃入，包办2球协助葡萄牙赢波出线。

葡萄牙历来第8次杀入世盃决赛周，自2002年日韩世盃开始从未缺席，其中C朗更加连续第5届出战决赛周，亦系呢位老将连续10届出战国际大赛(世界盃5次、欧国盃5次)。C朗系足球史上唯一一个连续9届国际大赛入波球员，年底喺卡塔尔有望延续呢个足球奇迹。

C朗同般奴费南迪斯经常被批评合作差劲，今场系2人合作接近4年以来，C朗第2次助攻般奴费南迪斯，呢位曼联中场赛後表示：「呢场比赛刻骨铭心，因为我哋杀入世界盃啦！所有人都雄心万丈，我同C朗都唔例外，通常都系我助攻畀佢入波，今场终於调番转。」C朗赛後亦喺社交网贴上全队威水合照，留言：「目标已达成！」