荷兰喺年底出战世盃决赛周前爆出震撼消息，领队尹戈尔周一(4日)喺电视直播节目入面，证实自己患上前列腺癌，而且病情严重，已进行咗25次放射治疗。70岁嘅尹戈尔喺治疗期间未有向球员透露自己病情，怕会影响球员演出，佢更表明会继续带领荷兰出战世盃决赛周。

尹戈尔接受荷兰电视节目《Humberto》直播访问，宣传佢嘅新电影《LOUIS》期间爆出惊人消息：「喺带领荷兰嘅日子，每晚我都要喺球员唔察觉情况下去医院，所有球员都以为我好健康，但事实唔系......你唔会同人讲你系咁样工作，因为可能影响到球员嘅选择同决心，所以我决定唔畀佢哋知道。」

呢位前曼联领队未有透露几时得悉患癌，但就证实病情并唔简单：「我唔会因为前列腺癌而死，至少90%嘅病例唔会，致命嘅通常系其他倂发症，我所患嘅癌症侵袭性好强，已经做咗25次放射治疗，而且之後嘅人生都仲有好多治疗要做。」尹戈尔自爆喺医院「走後门」得到优先治疗，并且得到最好嘅照顾。尹戈尔第1任妻子Obbes，喺1994年亦因肝癌同胰脏癌去世。

虽然受到恶劣病情影响，但尹戈尔表明唔会放弃荷兰领队工作，会继续带队出战12月嘅卡塔尔世界盃。荷兰喺日前嘅分组赛抽签被编入A组，会同东道主卡塔尔、厄瓜多尔及塞内加尔争夺出线权。荷兰国家队下次比赛系6月份，将会进行4场欧国联赛事。

尹戈尔患癌消息曝光後，佢2间曾经执教嘅球会曼联同巴塞隆拿，都已向佢送上祝福。尹戈尔对上一次执教球会，系2014年至2016年执教曼联，之前亦教过阿积士、巴塞隆拿同拜仁慕尼黑等顶尖劲旅，94/95球季带领阿积士赢过欧联冠军。