今季喺车路士一直未能稳占主力位置嘅卢卡古，上阵时间未如理想，亦明显对自己喺车仔嘅尴尬处境感到不满，情况引起比利时国家队领队马天尼斯嘅关注，近日马天尼斯就直言如果卢卡古唔想喺世盃嘅表现受到影响，今夏转会窗或者需要考虑他投。

季初由国际米兰转投车路士嘅卢卡古，去年因为自己喺车仔不受重用，曾经透过意大利传媒表达不满，虽然呢位比利时前锋事後就言论公开道歉，但可以话卢卡古喺球会处境尴尬，已经系公开嘅秘密。卢卡古今季英超只系获得12次正选上阵机会，上场面对宾福特一战，佢去到下半场65分钟先有机会後备上阵，最终亦未能帮助车仔改写输波命运。

世盃决赛周今年冬天将会展开，虽然距离开波仲有超过半年时间，但「欧洲红魔」主帅马天尼斯，当然非常关注国家队球员嘅状况，近日佢都向传媒讲到卢卡古嘅情况：「有好多球员今夏转会之後，或者会感觉唔同咗，其中卢卡古喺9月嘅情况需要被观察，另外夏萨特同其他球员都系一样。」

喺比利时国家队之前，马天尼斯曾经同卢卡古喺爱华顿合作，对呢位爱将当然好关心。马天尼斯表示会过咗夏天，先至开始衡量球员嘅状态，但认为今年夏天，对卢卡古等球员嚟讲意义重大，暗示呢位为「欧洲红魔」上阵超过100次嘅前锋，或者会有新动向。