因财务违规被扣21分嘅英冠球队打比郡，周一（18日）作客1球不敌昆士柏流浪，喺尾４雷丁同日和波拎到1分後，正式宣布护级失败，来季需要跌落英甲。不过前曼联名宿兼领队朗尼，赛後就表示为球员感到自豪，并表明希望下季继续留队帮手重建。

打比郡今季表现其实唔差，目前已经拎到52分，理应可以排喺中下游位置，可惜因为财政问题惨被扣分，最终导致降班收场，领队朗尼赛後态度亦显得相当正面：「当然会失望、悲伤、沮丧，但同时亦为球员感到自豪。无错系一种奇怪嘅感觉，但我从未见过一支球队降班後，球迷会有咁好嘅反应，多谢佢哋坚定不移咁支持，我认为太不可思议。」

球队虽然下季即将跌落英甲，但36岁嘅朗尼似乎并无离心，反而向传媒透露希望继续留队：「只要有老板收购，我愿意帮手重建球队，为球迷再次带嚟以往光辉嘅日子，我对留喺打比郡感到骄傲。」