曼联球星C朗拿度惨历丧子之痛！呢位葡萄牙前锋周二(19日)喺社交网发声明，证实女友乔治娜所怀嘅龙凤胎，只有女婴顺利诞生，男婴则胎死腹中。C朗形容事件系「天下父母最大痛苦」，体坛中人纷纷向C朗一家送上慰问。

C朗喺声明中表示：「我哋怀住最悲伤嘅心情宣布，我哋嘅儿子已经夭折，呢个系所有父母最大嘅痛苦。女儿嘅出生畀到我哋唯一力量，带住希望同幸福去渡过呢个时刻。感激医生同护士嘅专业照料同支持，我哋希望喺呢个困难时刻保留一啲私隐。我哋嘅小宝贝系个天使，永远都爱您。」

乔治娜今次诞女前，C朗已有4个仔女，包括11岁大仔小C朗拿度，4岁嘅孖胎Eva及Mateo，佢哋系由2位代母所生，而3岁嘅Alana Martina就系乔治娜所生。C朗宣布丧子後，曼联队友拉舒福特、迪基亚、英格兰名将连尼加、「飞人」保特等均喺社交网向佢送上慰问。