车路士卖盘迟迟未有结果，球会前途未明嘅情况下，车仔星散机会愈来愈大，近日车仔领队杜曹，就证实阵中主力守将鲁迪格，将於季尾以自由身离队嘅消息，并透露车仔已尽最大努力挽留呢位德国中坚。

现年29岁嘅鲁迪格，虽然现时正受伤患困扰，但今季依然神勇，喺车仔占据主力位置，杜曹承认鲁迪格喺车仔嘅作用十分关键，仲表示自己同球会已经尽晒氹佢留队，可惜最终都唔成功：「鲁迪格系好有个性同领导能力嘅球员，佢畀到好球队大信心，佢嘅离队对车路士嚟讲系好挑战，但我哋会揾到办法解决。」

据报车路士愿意为鲁迪格提供20万英镑周薪新约，但依然遭到拒绝，意味呢位德国中坚将会喺季尾他投，但佢下一站会去边，就依然未公布。车路士现时仍受英国政府制裁困扰，杜曹就话唔希望球会卖盘情况继续拖落去，如果唔系，来季组军情况必定会受到影响。