欧洲足协(UEFA)原本计划今届欧协联，等到决赛先至加入VAR，帮助球证作出判决，但依家事情有变，UEFA决定提早喺4强比赛就使用VAR技术，希望减少错判，令打入决赛嘅球队都属於实至名归。

VAR技术近年已经喺世界各地球赛广泛使用，但今届首次举行嘅欧协联并未有追随潮流，欧洲足协原本打算决赛先至加入VAR，不过近日宣布改变主意，提早4强使用，希望令比赛更加公平。

今年2月欧协联淘汰圈附加赛次回合，卡拉巴克主场对马赛，卡拉巴克前锋华治用手拍入个波，但球证睇唔到，又冇VAR帮手，判入波之後，即时引起争议。幸好卡拉巴克主帅古班洛夫叫华治「自首」认犯手球，球证先至改判入球无效，可见冇VAR，好大机会出现冤案。

今届欧协联4强分别由李斯特城对罗马、飞燕诺对马赛，两场波对赛双方实力势均力敌，预料应该会有唔少机会需要VAR帮手，难怪唔少球迷认为UEFA今次决定系「德政」。