据意大利传媒报道，今夏同摩纳哥约满嘅西班牙中场法比加斯，已答应加盟意乙球会科木，双方将会签约2年。35岁嘅法比加斯有唔少意甲球会垂青，但佢竟然选择去意乙落班，据报全因车路士名将韦斯。

曾效力过阿仙奴、巴塞隆拿同车路士嘅法比加斯，约满摩纳哥後未打算挂靴，据报意甲嘅莱切等球会都提出斟介，不过法比加斯就决定签约乙组嘅科木。科木喺2016年曾经破产，要由丁组业余联赛打起，不过2年前获一间伦敦公司入主後，成绩就不断上扬。

科木喺2021年由丙组升上乙组，上季以第13名成绩冲线，而球队依家嘅总监，就系前车路士球星韦斯，据报法比加斯答应去科木，就系因为韦斯极力游说，令佢相信科木嘅发展计划。