C朗同曼联领队坦哈格关系恶化，季初随时被雪藏，甚至离队，英国《每日邮报》指红魔鬼已经有收购前锋目标，就系史特加射手沙沙卡拉积锡，呢位奥地利国脚身高2米，若然成「魔」，将可以大大提升曼联高空轰炸能力。

虽然盛传曼联头号收购前锋目标系萨尔斯堡19岁新星施斯高，但由於多间大球会争夺呢位斯洛文尼亚国脚，红魔鬼想签入佢，并唔容易，加上球季即将开锣，紧急情况下，惟有向沙沙卡拉积锡埋手。

现年25岁嘅沙沙卡拉积锡3年前加盟当时仲系德乙球队嘅史特加，并协助球队升班，佢近2季德甲合共上阵48场入22球，最犀利当然系头槌攻门，如果曼联签入佢，起码多一瓣高空波。