周二(16日)凌晨西甲，马德里体育会作客以3比0大胜基达菲，新球季旗开得胜，马体会前锋祖奥菲历斯今仗贡献3次助攻，成为近11年以来，首位喺西甲上演助攻「帽子戏法」嘅马体会球员。呢位有「新C朗」之称嘅22岁葡萄牙国脚，曾经被质疑名不副实，今仗以行动证明身价。

祖奥菲历斯分别上下半场传畀艾华路莫拉达入波，造就呢位今季回巢嘅西班牙国脚梅开二度。踢到75分钟，祖奥菲历斯再直传畀後备上阵嘅基沙文射成3比0。

赛後马体会教练施蒙尼大赞祖奥菲历斯演出精彩：「菲历斯有天赋，正在成长，变得愈来愈成熟，大家有目共睹，佢喺球场上比其他人有更好嘅足球视野，佢传畀莫拉达射入嘅第1球非常精彩，令球队取得领先，菲历斯状态非常好，我希望佢继续成长。」

祖奥菲历斯2019年夏天以1.26亿欧元天价转会费，由宾菲加转投马体会，一度因为表现低迷，而被指系「水货」。不过，祖奥菲历斯上季演出已有明显提升，今季仲取得梦幻开局，省靓「新C朗」招牌。