曼联喺转会市场最後阶段发力，多个位置都有买人消息传出，门将位置亦系其中之一。据报曼联睇中爱华顿嘅比高域，不过呢位波斯尼亚国脚已经35岁，只能作为短期应急之用，唔少网民指曼联近期频频打老将主意，想将曼联变成老人院。

英国《每日电讯报》消息指，曼联领队坦哈格希望物色一个年轻2号门将，不过依家搵唔到心仪又可以转会嘅目标，所以预算用100万镑至700万镑资金签一个「短期2号」，而目标就锁定比高域。不过「拖肥糖」领队林柏特暂时唔想放人，除非佢哋物色到顶替人选，比高域同爱华顿只剩1年合约，曼联如果出价够高都有望成事。

曼联早前传出想签阿拿奥杜域(33岁)、奥巴美扬(33岁)、占美华迪(35岁)等前锋，中场亦重金收购30岁嘅卡斯米路，依家又斟35岁嘅比高域，唔好忘记曼联今夏其实已经签入36岁门将汤希顿，用2个老将作为31岁嘅迪基亚替补，未来几年嘅接班工作肯定有排忙。