利物浦今夏转会窗完结前由祖云达斯借入艾法美路，暂时喺欧联上阵1次，但主帅高普发现呢位巴西中场唔啱用，打算提前退货，然後喺冬窗期间补充中场兵力，有几个潜在人选将会斟介。

艾法美路生涯踢过巴塞隆拿同祖云达斯，今夏转会市场关闭前外借到利物浦，补充中场人脚，季初红军中场伤兵潮，堤亚高艾简达拿、佐敦轩达臣、拿比基达、居迪斯锺斯同阿历士张伯伦全部伤晒，原本系艾法美路上位好机会，欧联对拿玻里一仗下半场77分钟後备上阵，踢咗十几分钟，高普就发觉佢唔啱用，并决定将佢送返祖记。

利物浦同祖记协议借用艾法美路为期一年，但依家红军打算提前退租，想喺明年1月送佢返祖记，不过祖记亦唔打算接手，令呢位26岁中场陷入困境。

另边厢，高普打算喺冬季转会窗搵新中场，佢心目中已有人选，包括狼队中场马菲奥斯纽尼斯，宾菲加中场安素费南迪斯，同埋多蒙特中场祖迪比宁咸，不过上述3人身价不菲，想签佢哋其中一个都要从详计议。