英格兰主场3比3打和德国，系佢哋出战卡塔尔世界盃前最後1场赛事，普遍预期呢轮国际赛嘅阵容，就系修夫基出战世界盃嘅腹稿。随住哈利马古尼呢粒炸弹再度爆炸，要求将佢踢走嘅声音亦愈嚟愈高涨，查实英格兰中坚位置仲有唔少选择，只系睇修夫基点样抉择。

喺修夫基嘅3中坚阵式，可踢右闸同右中坚嘅史东斯系唯一「必然之选」，爱将哈利马古尼嘅位置亦稳如泰山，预料艾历迪亚、高亚迪、宾韦特、汤姆利、马克古希同泰朗明斯，将会争夺2至3个大军席位，修夫基近2仗都同艾历迪亚拍住哈利马古尼，效果麻麻，冇份上阵嘅汤姆利以及今次冇份入选嘅宾韦特，就被球迷视为更佳嘅正选人选。

效力AC米兰嘅汤姆利被视为正选人才，但今次对德国连23人大名单都入唔到，唔单止球迷错愕，名将里奥费迪南都忍唔住开火：「呢个决定真系要问修夫基，我觉得难以置信，汤姆利系意甲冠军嘅核心球员，而且踢得非常好，本来应该系正选，点可能连大名单都入唔到？你估英格兰好多中坚拣咩？我觉得修夫基已经决定好世界盃名单，所以直接唔用佢冇拣嘅人。」