周三(28日)欧国联B4组大战，塞尔维亚作客2比0击败挪威，呢场波被视为艾宁夏兰特同阿历山大米祖域嘅「神锋大战」，最终米祖域拎到佢喺国家队第50球，最重要系帮塞尔维亚赢波兼拎到升班资格。

塞尔维亚锋线人才济济，今场42分钟菲腊高斯迪助攻杜辛华荷域建功，而米祖域就喺54分钟攻入佢今届欧国联第6球，助塞尔维亚赢2比0。呢位28岁前锋成为塞尔维亚史上，第1个入50球球员，而且佢只系用76场比赛就达到呢个数字，比起美斯(107场)同C朗拿度(114场)效率更高。

米祖域过去1年入球大爆发，上季喺英冠丧入43球，今季英超目前7场入6球，喺世盃外8场入8球、欧国联5场入6球，今届世盃神射手要留意呢位超级前锋。