英超劲旅利物浦又失分，喺周六(1日)晚英超主场，一度落後2球之下，打和白礼顿3比3，爆出60倍波胆。红军连续2场联赛和波失分後，已经落後榜首阿仙奴11分，最大镬系将陷入「地狱赛程」，未来2场英超要斗阿仙奴同曼城，加上仲要兼顾欧联，实在非常难踢，若然再有差池，恐怕领队高普随时帅位不保。

利物浦开赛17分钟已经失2球，後衞阿历山大阿诺特连番犯错成为罪人，佢有25次失去控球权，属於全场球员之中最多，赛後大量利迷喺网上批评呢位23岁右闸表现令人恶心，绝对系灾难级，呼吁高普唔应该再将佢摆喺防线上。

事实上，即使「昏庸」如英格兰国家队领队修夫基都唔锺意用阿历山大阿诺特，早前2场欧国联都冇派佢上阵，但偏偏高普仍然重用呢位「防线黑洞」，实在令人费解。

高普亦承认球队今场表现攻不锐、守不稳，令佢谂番起7年前执教利物浦初期嘅表现，红军今季踢7场英超仅有10分，刷新高普领军以来最差开季成绩。

利物浦未来前路举步维艰，嚟紧周中欧联对格拉斯哥流浪，下轮英超就要作客阿仙奴，跟住又喺欧联再斗格流，然後英超主场对曼城，赛程紧密之余，对手亦非常强横，以利物浦目前颓势，恐怕好难翻身。

高普「7年之痒」魔咒警号再次响起，呢位德国名帅之前执教缅恩斯、多蒙特，都系大约7年就黯然离开，佢现已担任红军主帅7年，加上成绩急插水，可能今季将成为高普最後一季带领利物浦。

利物浦未来5场赛程

5/10 欧联主场Vs格拉斯哥流浪

9/10 英超作客Vs阿仙奴

13/10 欧联作客Vs格拉斯哥流浪

16/10 英超主场Vs曼城

20/10 英超主场Vs韦斯咸