皇马教练安察洛堤曾於季初表示，要将夏萨特改造成「假9号」，希望帮助佢重生，但呢位31岁比利时国脚表现仍然冇起色，睇波多过踢波，意大利传媒爆料指「夏神」提出明年1月冬季转会市场重开後离队，据悉皇马会长皮里兹已经同意。

夏萨特季初试过踢「假9号」位置，但发挥唔到作用，上阵6场入1球，安察洛堤改为用洛迪高高斯踢呢个位，效果非常好，呢位巴西国脚今季各项赛事上阵17场入7球。

夏萨特转型失败之後，认为自己留队已经冇意义，唔想等到2024年夏天约满，希望明年1月就走人。

虽然夏萨特状态持续低迷，但胜在名气大，仍然吸引唔少球会注意，意大利传媒指祖云达斯考虑到迪马利亚经常受伤，所以有兴趣签入「夏神」备用，但前题系唔需要转会费。

皇马2019年夏天以1亿欧元向车路士收购夏萨特，睇怕最後蚀到渣都冇。