周六(12日)晚英超，爱华顿作客以0比3不敌般尼茅夫，近7场联赛输5场，赛後大批随队出征嘅爱华顿球迷非常不满「拖肥糖」表现，鼓噪辱骂球员，爱华顿中场伊禾比上前安抚，送上球衣，但被球迷掟番转头，认真尴尬。

今场护级大战，般尼茅夫演出远胜一筹，由达华尼亚、基化摩亚、查顿安东尼各入1球，继上仗英联盃大胜爱华顿4比1之後，今仗英超再赠对方3蛋。爱华顿输波之後，跌至第17位，仅领先排尾三嘅诺定咸森林1分，降班威胁愈来愈大。

赛後爱华顿球迷起哄爆粗怒骂，几位「拖肥糖」球员上前安抚，伊禾比更加送上球衣，但被人掟番转头，需要迪马雷格雷帮手执番件球衣，场面非常尴尬。

不过，亦有爱华顿球员火上加油，包括门将比克福特上前同球迷理论，几乎发生冲突，需要保安介入，加上领队林柏特拉走球员，先至平息事件。

林柏特喺记者会上表示理解球迷感受：「球迷有权失望，毕竟一星期两次来到呢个球场，睇到球队表现差劣，我哋需要理解佢哋，佢哋可以表达意见，而且讲得几啱，有时候必须面对自己表现差嘅事实。」爱华顿上季惊险护级成功，林柏特保住帅位，恐怕今季未必再咁好彩。