近况低迷嘅车路士，周日(13日)凌晨作客0比1输畀纽卡素，喺联赛连输3场後跌落第8位，落後第4嘅热刺成8分咁多，9月份先至上任嘅领队朴达唔少决定受到质疑，据报班主保利都对佢嘅能力有疑问，随时考虑再搵新帅！

车路士今场再排怪阵，18岁小将贺尔首度正选出任左翼衞，干拿加历查以右翼姿态登场，同纽卡素激烈争抢但制造唔到具威胁埋门，全场唯一入球出现喺67分钟，祖尔韦洛克接应米基尔阿米朗传送狂轰入网，令「蓝战士」录得联赛3连败，英超不胜走势增加到5场。

英国《每日快报》报道，朴达嘅领军受到球迷猛烈批评，雪藏奥巴美扬、将史达宁改造成翼衞等决定都充满争议，球队表现亦比杜曹领军更不济，喺普捷天奴、勒夫等名帅仍然系自由身下，或会考虑再次换帅。