伊朗周日(13日)公布26人世盃大军名单，不过葡萄牙籍领队奎罗斯临时取消记者会，只系透过伊朗足总官网公布入围球员名单，有传佢系不满受到伊朗足总压力，要求佢放弃几位曾公开支持反政府示威嘅球星，包括利华古逊前锋阿斯蒙。

伊朗女子阿米尼（Mahsa Amini）上月因未戴好头巾，被道德警察拘留後死亡，引起席卷全国嘅反政府示威，包括阿斯蒙在内嘅几位球星都曾经公开支持示威者。伊朗传媒报道，国家队主帅奎罗斯喺点兵前，曾受足总压力要放弃阿斯蒙等球员，所以奎罗斯喺最後时间突然取消记者会，只系喺官网简单公布。

焦点人物阿斯蒙仍然喺26人大军单当中，其余星级球员好似波图嘅达利美、飞燕诺中场查汉巴克殊、宾福特翼锋沙文高度斯等悉数在列。