C朗同曼联反脸之後，预料将於明年1月转会市场重开後离队，呢位37岁葡萄牙巨星去向备受关注，英国《太阳报》指红魔鬼名宿碧咸出手邀请C朗，加盟旗下美职球队国际迈亚密，两位曼联经典7号合作，好有睇头。

据悉由碧咸做班主嘅国际迈亚密原本头号目标系美斯，但由於C朗有望提早离开曼联，碧咸认为系难得好机会，近日同C朗嘅代表联络，倾关於呢位射手加盟嘅可能性。

由於国际迈亚密球星希古恩早前美职收咧後，已经宣布退休，会方更加想签入C朗，既可填补锋线空缺，亦有新球星继续吸客。

事实上，C朗今季状态低迷，巴黎圣日耳门、拜仁慕尼黑、车路士等大球会应该唔会收留佢，母会士砵亭财力上难以负担C朗巨额人工，去美职或者中东联赛成为佢最大出路。

值得一提，国际迈亚密现时由前曼联後衞菲腊尼维利执教，虽然C朗同菲腊仔嘅哥哥加利尼维利不和，但相信如果佢愿意加盟国际迈亚密，应该唔会影响两人合作。