已经离开曼联2年嘅阿根廷後衞马高斯卢祖，最近讲番红魔经历，讲到当日佢离队经过，至今仍然忿忿不平，佢曾经向苏斯克查质问，点解哈利马古尼成日犯错仲可以上阵，答案令佢即场爆粗。

卢祖2014至2021年效力曼联，期间捧过英足盃、英联盃同欧霸盃，但自从2019签入哈利马古尼之後，佢上阵机会大减，2019至20球季英超仅试过只得1场正选上阵，全季仅上阵9场，而马古尼无论踢成点都稳坐正选，祖卢非常激气，为此同苏斯克查对质。

「有一日我走入苏斯克查间房，要求佢畀我正选上阵，否则离队，但佢竟然同我讲，一定要用马古尼，因为球会用咗好多钱买佢番嚟。我当时即场爆粗，马古尼每个星期都犯大错，Son of a b***h咁都唔畀我踢？」

曼联2019年收购哈利马古尼，转会费8000万镑打破後衞世界纪录，但佢加盟後球队未有好日子过，焗用佢嘅苏斯克查亦被炒，之後兰历克都冇符，直至今季由坦哈格领军，签入利辛度马天尼斯取代佢，球队先重上轨道。