皇家马德里金球前锋宾施马离队後，巴西前锋云尼斯奥斯祖利亚就成为球队孭飞球星，呢支西甲劲旅周一(12日)宣布，云尼斯奥斯下季将会改着7号波衫，延续鲁尔、C朗拿度嘅「传奇」故事。

22岁嘅云尼斯奥斯5年前由法林明高加盟，最初着28号波衫，之後改着25号，最近3季都系着20号，随住夏萨特提前解约离队，皇马就宣布腾空嘅7号波衫，下季会由云尼斯奥斯继承。皇马件7号波衫充满历史，曾经由哥柏、布达坚奴、鲁尔、C朗拿度等传奇拥有，云尼斯奥斯今次拎到7号，就系地位嘅象徵。

云尼斯奥斯早前因为受到种族歧视，发文怒轰西甲同西班牙纵容种族主义，一度被传可能离队，依家着7号波衫就粉碎传闻，证明皇马准备力捧佢做新王。除云尼斯奥斯外，洛迪高高斯下季亦会由21号转为11号，继承马高阿辛斯奥嘅号码。