曼联今夏希望收购新前锋，不过球队资金有限，据报收购哈利卡尼、域陀奥森汉2大贵价球星都冇着落，「红魔鬼」依家正力斟丹麦新星贺兰特加盟，呢位20岁前锋目前为国家队备战欧国外，消息指曼联「老大哥」基斯甸艾历臣将会做说客，喺国家队向佢落嘴头。

英国《曼彻斯特晚报》报道，上年加盟曼联嘅丹麦中场基斯甸艾历臣，喺今次国际赛负责为曼联游说贺兰特，虽然贺兰特喺卡塔尔世盃後先被丹麦力捧，但之前佢其实已2次为丹麦後备上阵，而基斯甸艾历臣都喺场上，不过贺兰特喺3月份国际赛2场入5球，基斯甸艾历臣就因伤缺阵。

报道指基斯甸艾历臣嘅游说任务唔算太艰巨，事关呢位效力阿特兰大嘅前锋，曾经喺访问自爆细细个已经系曼联球迷，最近被传获「红魔鬼」睇中，贺兰特亦回应：「曼联系一间伟大球会，如果传闻话佢哋想签我，就证明我嘅足球踢得好，即管睇下之後点样发展。」