曼城上年签入英格兰中场加云菲腊斯，不过呢位27岁球星发展不似预期，喺洛迪卡斯简迪嘅统治性表现下，加云菲腊斯被逼长坐冷板。不过曼城早前喺热身赛，曾经试踢双方中战术，畀加云菲腊斯同洛迪卡斯简迪同时上阵，如果实验成功，加云菲腊斯就有望「解冻」。

曼城早前对拜仁慕尼黑，加云菲腊斯同洛迪卡斯简迪下半场组成双防中，加云菲腊斯有较大自由参与进攻，类似喺国家队同迪格兰赖斯嘅合作模式，据报呢个组合系领队哥迪奥拿众多战术中嘅一个选择，如果加云菲腊斯可以把握机会，有望成为曼城重要一员。

加云菲腊斯上季只为曼城上阵21场，平均每场踢28分钟，而全季只有21分钟系同洛迪卡斯简迪同时上阵，当中又有6分钟系因为洛迪卡斯简迪客串中坚，所以哥迪奥拿喺季前畀佢哋试验中场拍档，对加云菲腊斯绝对系一个积极讯号。

加云菲腊斯早前亦表明唔会放弃争正选，拒绝离队：「我嘅目标系踢曼城，上季啱啱先做3冠王，冇理由要离开。我只系加盟12个月，唔会咁快就放弃。」