喀麦隆门将奥拿拿加盟曼联後，喺後场帮助组织嘅效用有目共睹，不过佢暂时最受欢迎嘅时刻，却系上场对多蒙特「闹爆」哈利马古尼一幕。前英格兰国脚艾邦拉荷日前公开质疑，话奥拿拿系「拣」哈利马古尼嚟闹，对住其他队友未必会爆，不过利辛度马天尼斯就力撑奥拿拿「闹得啱」。

曼联上场2比3输畀多蒙特，奥拿拿下半场救出险球後追住哈利马古尼闹，获球迷唔少好评，曾效力阿士东维拉嘅《talksport》主持艾邦拉荷质疑：「首先马古尼喺嗰一球波冇犯错，佢交个波畀中场(基斯甸艾历臣)，系个球员自己交咗畀人。我觉得马古尼已变成出气袋，奥拿拿闹佢就系因为佢好恰，佢够唔够胆闹利辛度马天尼斯？佢够唔够胆闹拉舒福特？如果马古尼犯错，我会明白奥拿拿咁做，但佢佢对其他队友都要一视同仁。」

不过，同奥拿拿喺阿积士已经合作嘅利辛度马天尼斯，就力撑奥拿拿「闹得啱」：「奥拿拿个性好强，系一个态度正面嘅领袖，佢要确保每个队友都处於最好状态，当你够专注，同队友争执都好闲，足球场上经常发生，佢哋(奥拿拿同哈利马古尼)之间冇任何问题。」