车路士周四(3日)喺美国同多蒙特踢热身赛，靠19岁小将贝斯度完场前1分钟入波，1比1逼和对手，继续保持季前热身赛不败走势。不过车路士领队普捷天奴赛後好头痕，事关法国前锋尼干古上半场膝伤离场，普捷天奴表示未知伤势有几严重，要等返英国後再做详细检查。

车路士今场稍占上风，不过尼干古喺22分钟撞伤膝头离场，就令球队气势被打断，半场踢成0比0。换边後两队都有大量换人，多蒙特喺80分钟由马里奥斯禾夫入波，以为胜利在望，车路士19岁小将贝斯度喺89分钟头槌追平，为车路士保住季前不败身。

喺热身赛表现突出嘅尼干古，退下火线後要喺场边敷冰治疗，普捷天奴赛後表示忧心：「军医帮佢检查紧，尼干古觉得膝头有啲问题，希望唔系大问题，但喺返英国做检查之好难有结论。我唔会怪球场草皮差，今次受伤只系运气唔好。」