今夏离开皇马一直未有班落嘅夏萨特，周二(10日)在个人社交网站发文宣布挂靴，结束16年比赛生涯。

32岁嘅夏萨特在IG上载4幅代表自己足球生涯重要时刻照片，分别效力里尔时期、车路士捧欧霸盃、皇马捧欧联，同埋戴上比利时国家队臂章，畀球迷缅怀一番。

「夏神」发文表示：「你要聆听自己心声，系时候结束喇，经过16年超过700场比赛，我决定结束比赛生涯。我嘅梦想已经实现，喺全球各地嘅球场上得到满足。喺我职业生涯当中，幸运地遇到好多顶级领队、教练同队友，多谢咁多位，我会好挂念你哋。」

「多谢我效力过嘅球会：里尔、车路士、皇马，同埋多谢比利时足总，特别多谢家人、朋友、导师，同埋不论高低起伏都同我一齐嘅人。最後，我要多谢你哋，我嘅球迷，你哋多年来拥护我同对我嘅鼓励。」

总结夏萨特生涯，球会赛上阵635场入168球157次助攻，国家队上阵126场入33球36次助攻，赢过1次法甲、1次法足盃、2次英超、2次欧霸盃、1次英足盃、1次英联盃、2次西甲、1次欧联、1次欧超盃、1次世冠盃、1次西班牙盃、2次西超盃，以及世盃季军。