周六(28日)德甲上演独狂赛事，拜仁慕尼黑主场对达斯泰特一战，上半场出现3张红牌下踢成0比0平手，但拜仁换边後突然全速开动，45分钟内狂轰8球大胜8比0，连中三元嘅哈利卡尼更喺中圈起脚入波，相当精彩！

今场比赛上半场系「红牌Show」，拜仁中场甘美治4分钟拉跌单刀嘅对手食红牌，极速打少1个，不过达斯泰特礼尚往来，加素拿21分钟同样踢跌单刀嘅干拉特赖马被逐，一模一样嘅犯规喺41分钟再次出现，哈利卡尼单刀被马列卡撞跌，球证再出红牌，半场拜仁10个打达斯泰特9个。

下半场拜仁火力全开，哈利卡尼51分钟插水式头槌入波，揭开大屠杀序幕，5分钟後利莱辛尼射成2比0，穆斯亚拿同利莱辛尼随後分别远射建功。全场最精彩1球出现喺69分钟，哈利卡尼喺自己後半场嘅中圈内接波，第一时间起脚笠入，杀得性起嘅拜仁再有汤马士梅拿同穆斯亚拿入波，哈利卡尼就喺完场前2分钟完成帽子戏法。

哈利卡尼今季9场联赛狂入12球，拜仁慕尼黑入34球创下德甲史上前9轮最高入球纪录，哈利卡尼赛後表示：「作为一个前锋，帽子戏法系非常好嘅感觉，我要多谢队友为我创造咁多机会。我要搵个合适地方安置呢个足球，不过首先我要搵到屋，依家摆喺酒店先。」