周一(13日)凌晨英超上演精彩入球骚！曼城喺作客3度领先车路士情况下，被倒戈嘅高尔彭马喺95分钟轰入12码，最终激战4比4完场，被誉为今季最好睇嘅比赛。车路士双星史达宁同高尔彭马今场倒戈大发神威，两位领队普捷天奴同哥迪奥拿都指今仗系英超娱乐性高嘅「最佳宣传」。

今场大战节奏极快，25分钟艾宁夏兰特禁区内被古古尼亚揽跌博到12码，佢亲自操刀先开纪录，不过4分钟後车仔即由堤亚高施华接应角球头槌追平，37分钟列斯占士右路传中，史达宁门前射入反超前2比1，但曼城补时阶段由文路尔艾简治头槌追和，半场两队踢成2比2平手。

换边後两队继续驳火，47分钟祖利安艾华利斯右路传中，艾宁夏兰特瞓身将个波撞入白界；再落後嘅车仔未放弃，67分钟靠尼高拉斯积逊门前执鸡追成3比3。完场前再掀高潮，86分钟洛迪卡斯简迪远射省中人弹入，曼城第3度领先，但去到补时5分钟车路士博到12码，高尔彭马轰入网顶以4比4完场。

今仗战情峰回路转，系英超自2009年利物浦4比4和阿仙奴後，首次出现4个扳平入波嘅赛事。曼城领队哥迪奥拿赛後表示：「你觉得好唔好睇？呢场系英超娱乐性嘅最佳宣传。比赛好紧凑，我觉得战果合理，双方都好想赢，我哋领先後嘅决定唔系完美，今仗两队都创造好多机会。」车路士领队普捷天奴亦话：「我哋希望赢波同领导呢场比赛，今仗话畀大家听点解英超系世界第1联赛。」