周一(4日)凌晨西甲大战，巴塞隆拿主场1比0击败马德里体育会，赢波功臣正正就系倒戈嘅祖奥菲历斯！呢位葡萄牙国脚今夏同马体会不欢而散，以借将身份射爆马体会後，更走去客队球迷面前挑衅性庆祝，尽吐乌气！

祖奥菲历斯上季被马体会打入冷宫，佢同教练施蒙尼亦因战术问题不和，最终宁愿大幅减薪都要外借加盟巴塞隆拿，受到马体会球迷炮轰。祖奥菲历斯去到巴塞後状态大勇，今场28分钟更尽展功架，接应拉芬夏比洛尼妙传後杀入禁区，乖巧笠过出迎嘅门将射入。祖奥菲历斯虽然仲系由马体会「拥有」，但佢亦唔介意得罪人，走去马体会球迷区面前张开双手庆祝，极尽挑衅。

祖奥菲历斯嘅行为引起马体会球员不满，中坚荷西基文尼斯更喺比赛中问祖奥菲历斯「系咪想打交？」马体会中场马高斯洛兰迪赛後表示：「我冇睇到祖奥菲历斯入波後做乜，亦唔在乎，每个人都要为自己行为负责。」至於巴塞教练沙维就话：「庆祝入波好正常，我赛前提佢要保持冷静，因为呢啲『额外动力』有时会令你失控，我好开心佢效力巴塞。」