非国盃同亚洲盃今个月展开，一众欧洲豪门亦提心吊胆，估唔到未开波「FIFA病毒」已出现，德国利华古逊主力前锋邦尼菲斯，日前为尼日利亚训练期间受伤，宣布退队无缘出战非国盃，据报佢将要休息6个星期，对利华古逊争德甲同样构成重大打击。

尼日利亚喺周一(8日)热身赛输畀畿内亚，邦尼菲斯因伤缺阵，据报佢喺赛前练习中鼠蹊受伤，消息指佢将要休养6个星期，呢位23岁前锋亦喺社交网同队友告别：「祝大家好运，希望你哋会有个成功嘅非国盃。」尼日利亚早前已有中场尼迪迪因伤退队，另一前锋伊恩拿祖亦有伤在身，令尼日利亚争冠机会受削。

最大「苦主」系德甲榜首利华古逊，邦尼菲斯系佢哋今季成绩突出嘅重要原因，佢喺各项赛事为利华古逊23次上阵，交出16个入波同8次助攻，如果真系要抖1个半月，对利华古逊争逐德甲系沉重打击。