曼联公布下季由坦哈格接手执教之後，同市劲敌曼城领队哥迪奥拿立即向呢位荷兰名帅发出祝贺，因为2人曾经喺拜仁慕尼黑共事，哥帅大赞坦哈格系世界顶级教练，好期待同佢碰面。

哥迪奥拿2013至16年执教拜仁慕尼黑期间，坦哈格曾经有2年时间担任拜仁二队教练，2人经常有见面及合作机会，哥帅对於下季可以同呢位旧同事喺英超交锋，感到非常高兴：「我要祝贺坦哈格，希望佢一切顺利，佢系1位顶级教练，佢嘅足球哲学同战术，令人睇得赏心悦目，大家睇佢教阿积士，就知道佢嘅领军水平极高。」

坦哈格2015年离开拜仁慕尼黑之後，转为担任荷甲球队乌德勒支教练，2017年成为阿积士主帅，估唔到下季可以同哥迪奥拿合演「曼市打吡」。