曼联队长哈利马古尼今季无论领导能力，以及场上表现都备受外界批评，唔少球迷甚至认为C朗拿度比佢更适合担任队长。领队兰历克近日就公开建议新帅坦哈格，下季应该由球员选出队长，睇嚟兰历克都对依名英格兰中坚逐渐失去耐性。

由球员集体选出队长依个方法，兰历克解释系嚟自德国，而曼城嘅哥迪奥拿、阿仙奴嘅阿迪达目前都正用紧。至於当被问到会唔会向新帅坦哈格，推荐哈利马古尼下季继续做队长个阵，兰历克就无正面回答：「我理解你嘅问题，但其实无咩意义，因为仲未知道下季会有啲咩类型球员，但以往我嘅做法就系揾四至五位核心球员，然後得票最多嘅，就可以成为球队队长。」

哈利马古尼2019年以天价由李斯特城转投曼联，一直稳坐正选位置，不过依名29岁中坚喺後防不时出现虾碌镜头，连累球队今季联赛频频失分，争夺前4机会渺茫。曼联周四深夜即将硬撼车路士，不过哈利马古尼赛前被指膝盖受伤，今场肯定缺阵，仲随时提早收咧，前一场对利物浦，或者已经成为马古尼最後一次戴上曼联嘅队长臂章。