曼联两大死敌曼城同利物浦为冠军打生打死，「红魔鬼」喺煞科日就几乎连欧霸盃席位都保唔住，佢哋作客0比1输畀水晶宫，全靠白礼顿喺另一边反胜韦斯咸，先至可以保住第6名位置。曼联新帅坦哈格今场首度入场观战，但就喺被影到几次睇到拧晒头，似乎今个夏天有排执。

曼联煞科战前领先韦斯咸2分，要赢波先确保欧霸盃资格，但今仗37分钟就被韦费特沙夏攻陷，而且喺C朗拿度缺阵下无力入波，最终输0比1。庆幸嘅系，韦斯咸喺另一仗半场领先白礼顿下，下半场连失3球输1比3，「红魔鬼」得以保住欧霸盃参赛资格，而韦斯咸就会出战欧协联。

荷兰教头坦哈格今仗首度入场，不过全程睇到黑晒面，半场期间同球迷合照亦「笑唔出」，着名记者Sam Pilger表示：「坦哈格喺包厢内多次睇到拧晒头，对阿历士迪尼斯嘅表现特别不满。」曼联输埋煞科战，系球队自1981年以来首次联赛作客6连败；今季曼联得失球差为0，亦系自89/90球季(-1)以来首次拎唔到正数。