英超劲旅热刺抵达南韩进行季前训练，大军喺首尔绝对唔系观光游览，领队干地立即展开佢嘅「地狱式」特训，周一(11日)招待6,000球迷入场嘅公开操练场面惨烈，一班球员练到抽晒筋，体力强如孙兴民都趴喺草地起唔到身，王牌前锋哈利卡尼更加「操到呕」，相当夸张。

虽然季前热身只系啱啱展开，热刺球员飞到首尔都唔够2日，但干地嘅魔鬼特训即刻展开，喺绰号「海军陆战队」嘅体能教练云杜尼带领下，球员进行咗90分钟超高强度训练，由於南韩依家非常湿热，气温高达30度，所有球员都练得非常辛苦，瑞典翼锋古路斯夫斯基只系练咗30分钟就出事，疑似小腿不适要提早结束练习。

孙兴民练习完後累瘫球场：https://bit.ly/3z7pkw1

其余球员「顶硬上」完成练习後，云杜尼再次要求全体球员绕场再跑42个圈，跑完之後几乎所有球员都瞓晒喺地，以体力强劲见称兼早适应南韩天气嘅孙兴民，一样面容扭曲咁瞓地休息，要队友扶住先企得番起身，而哈利卡尼据报更因运动量过大，练完後喺场边呕吐。热刺今次南韩之旅会踢2场，先喺周三(13日)对韩职明星队，3日後再斗西甲劲旅西维尔。