德国女足系欧洲霸主，近10届女子欧国盃有8届由佢哋捧盃，不过德国女子近年被其他球队赶上，对上一次拎欧国盃冠军已经系2013年，今届佢哋卷土重来，首仗4比0大炒丹麦女足就尽展霸气，其中「重炮手」马姬尔表现突出备受注目。

27岁嘅马姬尔效力拜仁慕尼黑，呢位中场系队中死球专家，射门力量同技术兼备，上仗对丹麦佢逼甩对方中坚後，单刀狂抽先开纪录。被问到佢嘅射术系点样练番嚟，马姬尔就话：「我经常上网睇人射波同射罚球嘅影片，碧咸嗰啲我睇过无数次，如果讲到踢法，我就锺意睇美斯、甘美治、沙维同恩尼斯达，不过要喺球场上面模仿系好难，我只系信任自己嘅球技。」

马姬尔对德国女子联赛水平下降亦表示关注，话希望今届欧国盃可以提升女足市场价值，呼吁德国女足要设切最低工资，尽快提升德国女足水平。