罗马主帅摩连奴近期积极喺转会市场，争夺自由身球员，继斟掂保罗戴巴拿之後，又准备签入另1位意甲射手比洛迪，呢位28岁意大利国脚今夏约满，并拒绝同拖连奴续约，睇嚟好可能跟「寸王」搵食。

罗马上季主要靠谭美阿巴谦入波，加上另一位进攻主力米希达利恩已离队，甚至连锋线新星尼高路辛尼奥路都可能转投祖云达斯，所以摩连奴不敢怠慢，希望再签入射手。

比洛迪效力拖连奴7季，上阵251场入113球，曾经获得多间大球会垂青，但会方一直拒绝放人，令佢未能登入豪门，等到今夏约满，终於可以自由身走人。

不过，比洛迪上季受伤患困扰，踢22场联赛仅入8球及1次助攻，罗马要签佢，存在一定风险。除咗罗马之外，AC米兰、阿特兰大、摩纳哥都有意邀请比洛迪加盟。