英格兰女子喺女子欧国盃杀入4强，将会同瑞典女足争入决赛，球队今届4场比赛只失1球，中坚美莉布拉特表现大获好评。呢位车路士中坚唔单止防守出色，更加可以客串埋前锋，成为领队威格曼嘅秘密武器。

美莉布拉特有1米78身高，头槌解围、白界前救波、准确拦截都系佢拿手好戏，而且当球队落後，佢更可以推上前线冲锋陷阵，今年2月「ARNOLD CLARK盃」对德国女足，美莉布拉特就喺尾段客串前锋为球队攻入1球，上仗8强对西班牙女足重施故技，就系佢喺禁区牵制西班牙2个守将，令队友得以完场前入波追平。

美莉布拉特经验丰富，不过之前喺国际大赛表现都好「黑仔」，上届女子欧国盃4强被荷兰女足淘汰，佢就曾经摆乌龙；3年前女子世界盃4强输畀美国女足，佢就食红牌被逐，不过美莉布拉特表示：「就系呢啲痛苦经历令我更有动力，我仍然喺足球旅程之中，向住目标进发。」