曼联球星C朗去向再有新发展，呢位37岁葡萄牙巨星喺英国时间周二(26日)联同经理人佐治文迪斯抵达红魔鬼训练基地，同会方摊牌。

曼联方面亦严阵以待，请来3位重量级人物费格逊、名宿白赖仁笠臣、前行政总裁基尔，一齐发功游说C朗留队。费Sir身为C朗恩师，一出声足以左右大局，依家就睇下C朗仲会唔会再次听呢位老人家说话。

盛传C朗不满曼联无缘来届欧联，所以要求离队，并缺席球队3星期季前操练，据悉佢今次重返训练基地，最大目的系同新帅坦哈格倾转会问题。

虽然C朗有离心，但仍然保持专业态度，出席球队嘅亚洲之旅总结会议，听坦哈格讲解战术安排。经理人佐治文迪斯同曼联行政总裁李察阿诺特会面，再次向对方反映C朗要求离队嘅意愿，英国传媒指曼联方面立场不变，重申唔会出售呢位射手。

李察阿诺特同佐治文迪斯周旋嘅同时，曼联亦派出3位德高望重人物费格逊、白赖仁笠臣、基尔喺训练基地餐厅等候C朗，落足嘴头劝佢留队。

当中以费Sir最为关键，佢同C朗亦师亦友，甚至情同父子，早於14年前，佢就成功劝服C朗留效曼联多1季，先至转投皇马。上年夏天，曼城几乎签入C朗，又系费Sir出手，令C朗改变主意重返曼联，依家又来到C朗去向十字路口，费Sir能否第3次留住C朗，大家拭目以待。