利物浦完成组军，但仲有少少手尾，就系安排第5中坚尼达利菲腊斯去留，红军打算将呢位25岁守将放售或外借，两支英超升班球队富咸同般尼茅夫都表示兴趣。

尼达利菲腊斯系红军青训出身，不过喺利物浦仅上阵半季，近年一直外借生涯，包括去过德乙史特加，上季为英冠般尼茅夫协助升班，今夏归队後有参加季前集训，不过佢喺队内中坚排序顺位排第5，今季如果留队上阵机会不大，因此将被放售或外借。

利物浦放售菲腊斯嘅目标价系1000万镑，今年初屈福特曾出价700万镑，比甲安德列治开出更低价格，均被红军拒绝，会方希望有意罗致菲腊斯嘅买家，能够满足要求。

消息指至少有4间球会接触利物浦，查询签入菲腊斯嘅可能性，其中富咸及般尼茅夫机会最大，两队重返英超後都想增强後防实力，富咸同利物浦高层关系友好，至於菲腊斯系般茅升班功臣，夹惯夹熟，都系菲腊斯落脚好去处。