英超劲旅车路士今夏将卢卡古外借後，收购新前锋计划迟迟未有进展，据转会权威记者Fabrizio Romano报道，车路士有意收购巴塞隆拿射手奥巴美扬，呢位前阿仙奴球星今年1月先转战西甲，估唔到相隔半年就有机会重返英超。

33岁嘅奥巴美扬因纪律问题，今年1月同阿仙奴提前解约，自由身转投巴塞隆拿，佢喺西甲上阵23场攻入13球表现翻生，不过球队今夏先後签入罗拔利云度夫斯基同拉芬夏比洛尼，奥巴美扬嘅正选位置不保，车路士有机会乘虚而入。

Fabrizio Romano指车路士同巴塞隆拿已经展开斟介，但暂时仍未出价，车仔领队杜曹同奥巴美扬曾经喺多蒙特合作，互双对对方都好了解，或有助达成交易。不过车路士嘅「前锋名单」仲有其他选择，包括效力萨尔斯堡嘅天才前锋锡斯高。