今轮英超除咗阿仙奴大胜般尼茅夫3比0，暂时升上榜首之外，另外一支伦敦劲旅热刺亦喺较早时间主场以1比0击败狼队，今场波观众席上仲出现1位「星级Fans」，就系巴西传奇射手朗拿度。

热刺方面不忘送咗1件印有朗拿度大名嘅9号球衣畀「大哨」，并影相放上球会社交网，趁机做传宣。

身为西甲球队华拉度列班主嘅朗拿度，今次飞去伦敦睇波，期间不忘影相同自拍，并引起传媒镜头注意，纷纷报道佢大驾光临。唔少网民指「大哨」先至系「纯正朗拿度」，暗踩曼联球星基斯坦奴朗拿度系「次货」，有人指「纯正朗拿度」来到英国，见到C朗目前处境，一定好难过。

至於点解朗拿度会选择入场睇热刺对狼队，原因众说纷纭，唔少球迷认为「大哨」可能想趁机拣卒，帮华拉度列签人。