西班牙球星碧基喺巴塞隆拿开始淡出，不过佢唔忧冇嘢捞，本身拥有西乙球会FC安道尔嘅佢，正为呢支今季升上西乙嘅神奇球队积极组军，最新目标系曼联中场新星麦比利，有望以借用身份加盟。

碧基喺2018年收购加泰罗尼亚球队FC安道尔，短时间内将该业余球会带上西乙，而且利用自己人脉为球队招兵，FC安道尔教练系前巴塞隆拿助教艾达沙拉比亚，今夏亦签入前巴塞隆拿B队中场奥利拉拿，野心勃勃。

据西班牙《阿斯报》报道，碧基准备为球队作出重磅增兵，目标直指曼联19岁中场麦比利，呢位新星已代表突尼西亚国家队上阵19次，上季亦曾2次为曼联喺英超上阵，报道指FC安道尔打算借用一季，如果球队可以升上西甲，更有权用2,500万欧元将佢买断。