车路士今季踢5场英超已失8球，以往固若金汤嘅防线荡然无存，会方今夏豪花8,900万镑买入嘅2位後衞高列巴尼、古古列拿今仗对修咸顿，表现令人失望，被寸系「纸板公仔」。

英国《每日邮报》指车路士计划再收购後衞，为防线止血，目标直指德甲劲敌RB莱比锡中坚加华度尔。

据悉车路士代表已经同RB莱比锡管理层展开谈判，车仔愿意以7,700万镑收购呢位20岁克罗地亚国脚。RB莱比锡方面对於价钱亦感到满意，但希望出售加华度尔畀车仔後，立即借用佢1季，令球队有足够时间搵接班人，以免实力突然受削。

不过，车路士现时陷入水深火热之中，当然想加华度尔立即加盟，成为两间球会最大分歧。

身高1米85嘅加华度尔可以司职中坚同左後衞，佢上季迅速冒起，为RB莱比锡上阵46次，并有2球进帐，早已吸引多间大球会注意，除咗车路士之外，曼城、热刺都想签入呢位天才後衞，车仔可能最终会接受RB莱比锡嘅要求，预订加华度尔。

除咗加华度尔之外，车路士亦即将签入李斯特城中坚韦斯利科芬拿，或有助解燃眉之急。