曼联由坦哈格执教後，阵容开始改朝换代，除咗C朗、哈利马古尼失去正选之外，左後衞劳基梳尔亦被打入冷宫，已经缺阵5场比赛，如果再沉沦落去，随时落选英格兰大军名单，无缘11月下旬举行嘅世界盃。

劳基梳尔上年夏天协助英格兰打入欧国盃决赛，并喺决赛开波2分钟就建功，为球队打开纪录，佢助攻力强，因而被称为「英格兰卡路士」。

仅过1年，劳基梳尔表现急速下滑，佢今季头2场英超上阵，曼联都输波，对宾福特一役，更加踢完上半场就被换走。

此後，劳基梳尔再冇为红魔鬼披甲，正选左闸由新加盟嘅杜维尔马拉西亚担任，结果曼联反弹，取得英超4连胜，仅於上仗欧霸盃半力出击下输波。

虽然坦哈格透露劳基梳尔有轻伤在身，但明眼一睇就知坦哈格已经唔再信任呢位27岁後衞，特别系杜维尔马拉西亚交到功课，实在冇理由再起用劳基梳尔。

距离世界盃决赛周开幕只有两个多月，除非劳基梳尔神奇回勇，否则好大会被英军主帅修夫基弃用。