英国传媒报道，英格兰领队修夫基决定全力支持哈利马古尼，准备押上自己声誉作担保。

消息指，马古尼将喺今场欧国联对意大利正选上阵，虽然佢喺曼联已失去正选地位，但修夫基仍然坚信，马古尼可以喺世盃前重拾状态，并认为佢系英军防线最佳选择。

修夫基认为马古尼相当重要，并相信自己判断冇错，以自己声誉作担保：「如果我哋有经验丰富球员加入竞争，而且水平比佢更好，咁就唔同讲法，不过目前马古尼系队中高波最具统治力嘅中坚，佢对我哋非常重要，我必须支持最好嘅球员。」

不过事实系，马古尼喺曼联已沦为後备，就算喺欧霸盃都唔敢点用佢，至於英格兰喺欧国联出现降班危机，有球迷向修夫基柴台，情况不妙，但修夫基坚持信任马古尼，相当大胆。