曼联名宿里奥费迪南又畀意见，佢寻晚为多蒙特大炒西维尔做评述节目，大赞蜜蜂兵团中场祖迪比宁咸踢得好，话佢系同龄中最全面嘅中场，劲过谢拉特、林柏特、史高斯，叫曼联快啲买。

多蒙特喺呢场欧联分组赛作客大炒西维尔4比1，祖迪比宁咸交出1入球1助攻，表现出色，现场评述嘅里奥费迪南表示：「佢依家所做嘅嘢，佢嘅位置，喺呢个年龄我未见过，谢拉特、林柏特、史高斯......都做唔到，佢非常全面。」费迪南叫曼联尽快行动。

曼联同多蒙特有交易渠道，上季从多蒙特收购查顿辛祖，已成为球队边路主力，今季喺艾宁夏兰特争夺战当中早早退出竞争，错失咗该位挪威锋霸，费迪南睇嚟好心急，唔想曼联再错过比宁咸。

早前多间英国传媒报道，祖迪比宁咸将成为明年夏天转会焦点之一，利物浦、车路士等队都准备抢人，转会费估计抢至近亿镑天价。