阿仙奴前锋加比尔马天尼利上仗射入1球及1次助攻，协助球队以3比2击败利物浦，表现光芒四射，英国《每日邮报》指兵工厂准备同呢位21岁巴西国脚倾续约，将大幅加佢人工，由现时7万镑周薪加到20万镑。

加比尔马天尼利将於2024年夏天约满，会方有权优先同佢续约，但考虑到呢位新星表现愈来愈出色，为免被其他大球会挖角，所以兵工厂希望提早同马天尼利续约，并有意开出20万镑周薪条件，令佢成为队内最高人工球员之一。

阿仙奴现时只有2位球员周薪达20万镑，包括加比尔捷西斯、汤马士柏迪，会方亦打算向另1位年轻主力布卡约沙卡开出20万镑周薪新约，所以阿仙奴开畀马天尼利嘅新约，已经属於球队顶薪。

不过，据悉加比尔马天尼利嘅代表对於续约条件仍然唔满意，双方仲未达成协议，兵工厂随时需要加码，先至留得住呢位天才射手。