世盃D组丹麦大战突尼西亚，亦系「红魔鬼」曼联师兄弟内讧，今季表现出色嘅基斯甸艾历臣系丹麦灵魂人物，而突尼西亚中场米积伯利，亦系曼联领队坦哈格重点栽培新人，佢今季被外借去伯明翰吸取经验，依家更有机会喺世盃舞台同「师兄」对叠，实在难能可贵。

19岁嘅米积伯利喺法国出世，3年前曼联喺摩纳哥手上撬走呢位新星，目前已有3次英超上阵纪录，今夏亦有随曼联去泰国同澳洲踢季前热身，表现受到坦哈格赏识，外借伯明翰後演出同样获得赞扬，今届世盃拎到件8号波衫，预示佢会系突尼西亚嘅主力。

对於米积伯利等曼联小将有份出战世盃，基斯甸艾历臣亦唔介意向呢位分组赛对手提出忠告：「好好享受！踢世界盃嘅机会唔系成日有，能够参与已经非常特别，尽可能把握每1分钟嘅上阵时间，喺世界盃比赛嘅感觉系与别不同，尽情享受属於你嘅时间。」