法国喺周日(18日)晚世盃决赛输畀阿根廷，王牌前锋基利安麦巴比未能第2度捧走世盃冠军，原定佢踢完决赛周後会有10日假期「叉电」，不过佢只系抖咗72个钟头，周三(21日)即返去巴黎圣日耳门(PSG)复操，准备即刻为球会上阵。

基利安麦巴比踢完决赛後行程紧密，由卡塔尔飞返巴黎过生日，据报佢周一(19日)已联络PSG教练加迪亚同顾问甘波斯，表达希望提前归队嘅意愿，由於美斯同尼马踢完世盃都会放假，基利安麦巴比选择提前归队，加迪亚当然无任欢迎。

PSG会喺下周四(29日)凌晨法甲主场对斯特拉斯堡，基利安麦巴比有1个星期时间准备，如无意外可以喺法甲重开後立即披甲。